ଏମ୍ସ ଭୁବନେଶ୍ୱରରେ ସ୍ୱଚ୍ଛତା ସ୍ୱତନ୍ତ୍ର ଅଭିଯାନ ୨.୦ ମାସ ଉଦଯାପିତ

ଭୁବନେଶ୍ୱର, ୧/୧୧/୨୦୨୨: “ଏମ୍ସ ଭୁବନେଶ୍ୱରକୁ ସଫା ରଖିବା ସମସ୍ତଙ୍କ ଦାୟିତ୍ଵ। ଏହି ଜାତୀୟ ସ୍ବାସ୍ଥ୍ୟସେବା ପ୍ରତିଷ୍ଠାନକୁ ଚିକିତ୍ସା ନିମନ୍ତେ ଆସୁଥିବା ହଜାର ହଜାର ରୋଗୀଙ୍କ ପାଇଁ ଏକ ସ୍ୱଚ୍ଛ, ଡାକ୍ତରଖାନା ଯୋଗାଇବାଦେବା ନିମନ୍ତେ ଏହି ଅନୁଷ୍ଠାନର ସମସ୍ତ ହିତାଧିକାରୀ ପ୍ରତିଶ୍ରୁତିବଦ୍ଧ ହେବା ଉଚିତ ବୋଲି ଏମ୍ସ ଭୁନେଶ୍ଵରର ସଭାପତି ତଥା ଦେଶର ବିଶିଷ୍ଟ ଚିକିତ୍ସକ ପ୍ରଫେସର ସୁବ୍ରତ ଆଚାର୍ଯ୍ୟ ପ୍ରକାଶ କରିଛନ୍ତି।

ଏମ୍ସରେ ଦୀର୍ଘ ଏକ ମାସ ଧରି ଚାଲିଥିବା ସ୍ୱଚ୍ଛତା ଅଭିଯାନ-୨.୦ର ସମାରୋପ ସମାରୋହ ଅବସରରେ ଏପରି ମତ ରଖିଛନ୍ତି ଡକ୍ଟର ସୁବ୍ରତ ଆଚାର୍ଯ୍ୟ। ଏମ୍ସ ଭୁନେଶ୍ଵର ମିନି ଅଡିଟୋରିୟମରେ ଗତକାଲି ସନ୍ଧ୍ୟାରେ ଅନୁଷ୍ଠିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଯୋଗ ଦେଇ ଅନୁଷ୍ଠାନର କାର୍ଯ୍ୟନିର୍ବାହୀ ନିର୍ଦ୍ଦେଶକ ପ୍ରଫେସର (ଡ) ଆଶୁତୋଷ ବିଶ୍ୱାସ ସଫଳତାର ସହିତ ଏହି ଅଭିଯାନକୁ ସମାପ୍ତ କରିଥିବାରୁ ସମସ୍ତଙ୍କୁ ଅଭିନନ୍ଦନ ଜଣାଇଥିଲେ। ଏଥି ସହିତ ସ୍ବଚ୍ଛତା ରୂପକ ଯାତ୍ରାକୁ ନିତିଦିନିଆ ଜୀବନର ଅଂଶ ଭାବେ ପାଳନ କରିବାକୁ ଆହ୍ବାନ କରିଥିଲେ ଡ ବିଶ୍ୱାସ।

ଅନ୍ୟମାନଙ୍କ ମଧ୍ୟରେ ଏମ୍ସ ଭୁବନେଶ୍ୱର ଡି ନ ଡକ୍ଟର ପି ଆର ମହାପାତ୍ର, ମେଡିକାଲ୍ ଅଧୀକ୍ଷକ ଡ ସଚ୍ଚିଦାନନ୍ଦ ମହାନ୍ତି, ଡିଡିଏ (ଭାରପ୍ରାପ୍ତ) ରଶ୍ମି ରଂଜନ ସେଠୀ, ଏଫଏ ପି କେ ସା ହୁ, ଏସ୍ ଇ କେ ପି ମିଶ୍ର ପ୍ରମୁଖ ମଞ୍ଚାସୀନ ଥିଲେ।

ଡାକ୍ତରଖାନା ପ୍ରଶାସନ ବିଭାଗର ପ୍ରଫେସର ତଥା ମୁଖ୍ୟ ଡ ଜବାହର ଏସ୍ ପିଲ୍ଲାଇ ସମସ୍ତଙ୍କୁ ସ୍ୱାଗତ କରିଥିଲେ ଏବଂ ଏକ ମାସ ଧରି ଚାଲିଥିବା ଏହି ଅଭିଯାନରେ ଅନୁଷ୍ଠାନ ଦ୍ୱାରା କରାଯାଇଥିବା ସମସ୍ତ ଘଟଣା ଏବଂ କାର୍ଯ୍ୟକଳାପକୁ ବର୍ଣ୍ଣନା କରିଥିଲେ।
ଏହି ଅବସରରେ ଜୀବନର ଏକ ଅଂଶ ଭାବରେ ସ୍ୱଚ୍ଛତା ଅଭ୍ୟାସ କରିବା ନେଇ ସଚେତନତା ସୃଷ୍ଟି ପାଇଁ ନର୍ସିଂ ଦଳ ଦ୍ୱାରା ଏକ ନୁକ୍କଡ ପରିବେଷଣ କରାଯାଇଥିଲା । ସମ୍ପୂର୍ଣ୍ଣ ଅଭିଯାନର ଏକ ବୃତ୍ତ ଚିତ୍ର ମଧ୍ୟ ପ୍ରଦର୍ଶିତ ହୋଇଥିଲା।

ବୃକ୍ଷରୋପଣ, ଜନ ସ୍ୱଚ୍ଛତା ଅଭିଯାନ, ଜନସଚେତନତା ଅଭିଯାନ (ବିଦ୍ୟାଳୟ, ଆନ୍ତରାଜ୍ୟ ବସ୍ ଟର୍ମିନାଲ୍, ସପିଂ ମଲ୍), କର୍ମଚାରୀଙ୍କ ସନ୍ତାନ ଙ୍କ ମଧ୍ୟରେ ଚିତ୍ରାଙ୍କନ ଏବଂ ପ୍ରବନ୍ଧ ଲେଖା ପ୍ରତିଯୋଗିତା ଏବଂ ଏହି ଅଭିଯାନକୁ ତ୍ବରାନ୍ବିତ କରିବା ପାଇଁ ଅନେକ କାର୍ଯ୍ୟକ୍ରମ ହାତକୁ ନିଆାଇଥିଲା । ଏଥିସହ, ମାସର ପ୍ରତ୍ୟେକ ଦିନକୁ ବିଭିନ୍ନ ବିଭାଗକୁ ଦିଆଯାଇଥିଲା ଏବଂ ପ୍ରତ୍ୟେକ ବିଭାଗ ବିଶେଷ କାର୍ଯ୍ୟକଳାପ କରି ଏହି ମେଗା ଅଭିଯାନରେ ସହଯୋଗ କରିଥିଲେ।

ଶ୍ରେଷ୍ଠ ଆଇସିୟୁ, ୱାର୍ଡ, ଓପିଡି, ଓଟି ଏବଂ ୟୁନିଟ୍, ପ୍ରବନ୍ଧ ଲେଖା ପ୍ରତିଯୋଗିତା ଏବଂ ପେଣ୍ଟିଂ ପ୍ରତିଯୋଗିତାର ବିଭିନ୍ନ ପ୍ରତିଯୋଗିତାର ସମସ୍ତ ବିଜେତାଙ୍କୁ ଏହି ଅବସରରେ ପୁରସ୍କୃତ କରାଯାଇଥିଲା।
ଡ ମୁକୁନ୍ଦ ଚନ୍ଦ୍ର ସାହୁ ଧନ୍ୟବାଦ ଅର୍ପଣ ସହିତ କାର୍ଯ୍ୟକ୍ରମ ଶେଷ କରିଥିଲେ। ଏହି କାର୍ଯ୍ୟକ୍ରମରେ ସମସ୍ତ ବିଭାଗର ଅଧ୍ୟାପକ, ଆବାସିକ ଡାକ୍ତର, ନର୍ସିଂ ଅଫିସର,

ପ୍ରଶାସନିକ ଅଧିକାରୀ ଏବଂ ଅନ୍ୟ କର୍ମଚାରୀମାନେ ଉପସ୍ଥିତ ଥିଲେ।
ଉଲ୍ଲେଖଯୋଗ୍ୟ ଯେ ଏମ୍ସ ଭୁବନେଶ୍ୱର ସ୍ବଚ୍ଛତା କୁ ନେଇ ଶ୍ରେଷ୍ଠତା ପାଇଁ
କ୍ରମାଗତ ତିନି ବର୍ଷ ପାଇଁ ସର୍ବୋତ୍ତମ କାୟାକଳ୍ପ ପୁରସ୍କାର ପାଇଛି।