ମା’ଙ୍କ ପସନ୍ଦରେ ଅଭିନୟ ଦୁନିଆକୁ ଆସିଥିଲେ ସିଦ୍ଧାର୍ଥ, ଏହି ସିରିଏଲ୍ ଦେଇଥିଲା ପରିଚୟ

ବଲିଉଡ୍ ଜଗତରୁ ବହୁତ ଦୁଃଖଦ ଖବର ସାମ୍ନାକୁ ଆସିଛି । ବିଗ୍ ବସ୍ ୧୩ ବିଜେତା ତଥା ଜଣାଶୁଣା ଟିଭି ଅଭିନେତା ସିଦ୍ଧାର୍ଥ ଶୁକ୍ଲା ଏହି ଦୁନିଆରେ ଆଉ ନାହାଁନ୍ତି । ସିଦ୍ଧାର୍ଥ ମାତ୍ର ୪୦ ବର୍ଷ ବୟସରେ ହୃଦଘାତରେ ମୃତ୍ୟୁ ବରଣ କରିଛନ୍ତି। ସିଦ୍ଧାର୍ଥ ଏହି ଦୁନିଆରେ ଆଉ ନାହାଁନ୍ତି ବୋଲି କେହି ବିଶ୍ୱାସ କରିପାରୁନାହାଁନ୍ତି ।

ସିଦ୍ଧାର୍ଥ କେବଳ ଟିଭିର ଜଣେ ଜଣାଶୁଣା ଚେହେରା ନୁହଁନ୍ତି, ସେ କରନ ଜୋହରଙ୍କ ଫିଲ୍ମ ହମ୍ପ୍ଟି ଶର୍ମା କି ଦୁଲହନିଆରେ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ସିଦ୍ଧାର୍ଥ ବିଗ୍ ବସ୍ ସିଜନ୍ ୧୩ ର ମଧ୍ୟ ବିଜେତା ହୋଇଥିଲେ । ତାଙ୍କ ବିୟୋଗ ଖବର ଶୁଣି ତାଙ୍କ ପ୍ରଶଂସକମାନେ ଆଶ୍ଚର୍ଯ୍ୟ ହୋଇଯାଇଛନ୍ତି।

ସିଦ୍ଧାର୍ଥ ଟିଭିର ଜଣେ ପ୍ରସିଦ୍ଧ ଚେହେରା ହୋଇଥିଲେ କିନ୍ତୁ ସେ ମଡେଲିଂ କିମ୍ବା ଅଭିନୟ ପ୍ରତି ଆଗ୍ରହ ପ୍ରକାଶ କରିନଥିଲେ, ସେ ସର୍ବଦା ବିଜନେସ୍ କରିବାକୁ ଚାହୁଁଥିଲେ। ତାଙ୍କର ଲୁକ୍ସ ଯୋଗୁଁ ସେ ଲୋକମାନଙ୍କୁ ଆକର୍ଷିତ କରୁଥିଲେ। ୨୦୦୪ ମସିହାରେ ଥରେ, ତାଙ୍କ ମାଙ୍କ କଥାରେ ସେ ଏକ ମଡେଲିଂ ପ୍ରତିଯୋଗିତାରେ ଭାଗ ନେଇଥିଲେ। ସିଦ୍ଧାର୍ଥ ପୋର୍ଟଫୋଲିଓ ବିନା ସେଠାରେ ପହଞ୍ଚିଥିଲେ। କିନ୍ତୁ ତାଙ୍କ ଲୁକ୍ସକୁ ଦେଖି ଜୁରିମାନେ ତାଙ୍କୁ ସିଲେକ୍ଟ କରିଥିଲେ।

ସିଦ୍ଧାର୍ଥ ତାଙ୍କ ଅନିଚ୍ଛା ସତ୍ତ୍ୱେ ମାଙ୍କ ନିର୍ଦ୍ଦେଶରେ ଏହି ପ୍ରତିଯୋଗିତାରେ ଭାଗ ନେଇଥିଲେ କିନ୍ତୁ ସେ ଜାଣି ନଥିଲେ ଯେ ଏହା ତାଙ୍କ ଭାଗ୍ୟ ବଦଳାଇଦେବ। ସିଦ୍ଧାର୍ଥ ଏହି ପ୍ରତିଯୋଗିତାରେ ଜିତିଥିଲେ। ଏହା ପରେ ସିଦ୍ଧାର୍ଥଙ୍କୁ ୨୦୦୮ ରେ ତୁର୍କୀରେ ଆୟୋଜିତ ହୋଇଥିବା ବିଶ୍ୱର ସବୁଠାରୁ ବଡ ମଡେଲିଂ ସୋକୁ ପଠାଯାଇଥିଲା। ସେଠାରେ ସିଦ୍ଧାର୍ଥ ଜିତି ଦେଶର ନାମକୁ ଆଲୋକିତ କରିଥିଲେ।

ପରେ ସେ ଏକ ଫେୟାରନେସ୍ କ୍ରିମର ବିଜ୍ଞାପନରେ କାମ କରିଥିଲେ। ଏହି ବିଜ୍ଞାପନ ପରେ ସେ ଟିଭି ସୋ’ ‘ବାବୁଲ କା ଆଙ୍ଗନ ଛୁଟେ ନା’ରେ ମୁଖ୍ୟ ଭୂମିକା ଗ୍ରହଣ କରିଥିଲେ। ହେଲେ ସେ ଏହି ସିରିଏଲରୁ ଅଧିକ ସ୍ୱୀକୃତି ପାଇନଥିଲେ। ଏହା ପରେ ସେ କଲର୍ସ ଟେଲିଭିଜନ ସୋ ‘ବାଲିକା ବଧୁ’ରେ ଶିବଙ୍କ ଭୁମିକା ଗ୍ରହଣ କରିଥିଲେ । ଏହି ଧାରାବାହିକରୁ ସିଦ୍ଧାର୍ଥ ନିଜର ପରିଚୟ ସୃଷ୍ଟି କରିଥିଲେ । ଉଲ୍ଲେଖନୀୟ କଥା ହେଉଛି, ଏହି ସୋ’ରେ ତାଙ୍କର ହିରୋଇନ୍ ହୋଇଥିବା ପ୍ରତ୍ୟୁଷା ବାନାର୍ଜୀ ମଧ୍ୟ ଏହି ଦୁନିଆରେ ନାହାଁନ୍ତି ।

ସିଦ୍ଧାର୍ଥଙ୍କୁ ରଶ୍ମୀ ଦେଶାଇଙ୍କ ସହିତ କଲର୍ସ ସୋ ‘ଦିଲ୍ ସେ ଦିଲ୍ ତକ୍’ରେ ଦେଖିବାକୁ ମିଳିଥିଲା। କୁହାଯାଏ ଯେ ସୋ’ ବ୍ୟତୀତ ଉଭୟ ବାସ୍ତବ ଜୀବନରେ ପରସ୍ପରର ନିକଟତର ହୋଇଥିଲେ କିନ୍ତୁ ପରେ ସେମାନଙ୍କର ବ୍ରେକଅପ୍ ହୋଇଯାଇଥିଲା। ଏଥି ସହିତ ବିଗ୍ ବସ୍ ରେ ସିଦ୍ଧାର୍ଥ ଏବଂ ଶେହନାଜଙ୍କ କେମେଷ୍ଟ୍ରି ମଧ୍ୟ ପ୍ରଶଂସକଙ୍କ ହୃଦୟ ଜିତିଥିଲା।