ରୁଷର କରୋନା ଭାଇରସ୍ ଟିକା ସ୍ପୁତନିକ ଭି ପୁଣି ଥରେ ସନ୍ଦେହ ଘେର ମଧ୍ୟକୁ ଆସିଛି | ଟିକା ନେଉଥିବା ପ୍ରତି ସାତଜଣରୁ ଜଣେ ସ୍ୱେଚ୍ଛାସେବୀଙ୍କଠାରେ ଏହାର ପାର୍ଶ୍ୱ ପ୍ରତିକ୍ରିୟା ଦେଖିବାକୁ ମିଳିଛି | ରୁଷର ସ୍ୱାସ୍ଥ୍ୟମନ୍ତ୍ରୀ ମିଖାଇଲ୍ ମୁରାଶ୍କୋ ନିଜେ ଏହି ସୂଚନା ଦେଇଛନ୍ତି। ମସ୍କୋ ଟାଇମ୍ସକୁ ଦେଇଥିବା ବିବୃତ୍ତିରେ ମୁରାଶ୍କୋ କହିଛନ୍ତି ଯେ ଟିକା ନେଉଥିବା ପ୍ରାୟ ୧୪ ପ୍ରତିଶତ ଲୋକଙ୍କ ଠାରେ ଏହାର ପାର୍ଶ୍ୱ ପ୍ରତିକ୍ରିୟା ଦେଖାଦେଇଛି।
ମସ୍କୋ ଟାଇମ୍ସ ସ୍ୱାସ୍ଥ୍ୟମନ୍ତ୍ରୀଙ୍କ ତରଫରୁ କହିଛି ଯେ କରୋନା ଜୀବାଣୁ ଟିକା ନେବା ପରେ ପ୍ରତି ସାତଜଣଙ୍କ ମଧ୍ୟରୁ ଜଣଙ୍କ ଠାରେ ଦୁର୍ବଳତା ଏବଂ ମାଂସପେଶୀ ଯନ୍ତ୍ରଣା ଭଳି ପାର୍ଶ୍ୱ ପ୍ରତିକ୍ରିୟା ଦେଖାଦେଇଛି। ତେବେ ମୁରାଶ୍କୋ କହିଛନ୍ତି ଯେ ଏହି ପାର୍ଶ୍ୱ ପ୍ରତିକ୍ରିୟାଗୁଡ଼ିକ ବିଷୟରେ ପୂର୍ବରୁ ଜଣାଥିଲା ଏବଂ ପରଦିନ ସେମାନେ ଆରୋଗ୍ୟ ହୋଇଯାଇଥିଲେ।
ଏହି ଟୀକାର କ୍ଲିନିକାଲ ପରୀକ୍ଷଣର ପ୍ରାରମ୍ଭିକ ଫଳାଫଳ ୪ ସେପ୍ଟେମ୍ବରରେ ଦି ଲାନସେଂଟ୍ ଜର୍ଣ୍ଣାଲରେ ପ୍ରକାଶିତ ହୋଇଥିଲା | ଏହି ଟିକା ଦୁଇ ଭାଗରେ ୭୬ ଜଣଙ୍କୁ ଦିଆଯାଇଥିଲା। ଫଳାଫଳରୁ ଜଣାପଡିଛି ଯେ ସ୍ପୁତନିକ୍ ଭି ସଂପୂର୍ଣ୍ଣ ସୁରକ୍ଷିତ ଏବଂ କୌଣସି ଗମ୍ଭୀର ପାର୍ଶ୍ୱ ପ୍ରତିକ୍ରିୟା ବିନା ଏଥିରୁ ୨୧ ଦିନ ମଧ୍ୟରେ ସ୍ୱେଚ୍ଛାସେବୀମାନଙ୍କ ଶରୀରରେ ଆଣ୍ଟିବଡି ସୃସ୍ଟି ହୋଇଛି |
ତେବେ ଟୀକାକରଣର ପାର୍ଶ୍ୱ ପ୍ରତିକ୍ରିୟା ‘ଦ ଲାନସେଂଟ୍’ରେ ମଧ୍ୟ ଉଲ୍ଲେଖ କରାଯାଇଥିଲା। ଏହା ଅନୁଯାୟୀ, ୫୮ ପ୍ରତିଶତ ଲୋକ ଇଞ୍ଜେକ୍ସନ ଲଗାଇଥିବା ସ୍ଥାନରେ ଯନ୍ତ୍ରଣା ଅନୁଭବ କରିଥିଲେ। ଏଥି ସହିତ, ୫୦% ଲୋକ ଉଚ୍ଚ ଜ୍ୱର ହୋଇଥିବା ଅଭିଯୋଗ କରିଥିଲେ, ୪୨% ଲୋକଙ୍କର ମୁଣ୍ଡବିନ୍ଧା ହୋଇଥିଲା, ୨୮% ଲୋକଙ୍କର ଦୁର୍ବଳତା ଏବଂ ୨୪% ଲୋକ ମାଂସପେଶୀ ଯନ୍ତ୍ରଣା ଅନୁଭବ କରୁଥିବା ଅଭିଯୋଗ କରିଥିଲେ।
ଲାନସେଂଟରେ ପ୍ରକାଶିତ ଏହି ଅଧ୍ୟୟନରେ ଦର୍ଶାଯାଇଛି ଯେ ଟିକା ଗ୍ରହଣ କରିବାର ୪୨ ଦିନ ମଧ୍ୟରେ ସ୍ୱେଚ୍ଛାସେବୀମାନଙ୍କଠାରେ ଦେଖାଯାଇଥିବା ଲକ୍ଷଣଗୁଡିକ ବହୁତ ସାମାନ୍ୟ ଏବଂ ସେଥିରେ କୌଣସି ଗୁରୁତର ପାର୍ଶ୍ୱ ପ୍ରତିକ୍ରିୟା ଦେଖିବାକୁ ମିଳି ନଥିଲା। ଅଧ୍ୟୟନର ଲେଖକମାନେ କହିଛନ୍ତି ଯେ ପ୍ରତ୍ୟେକ ଟିକା ପରେ ଏହିପରି ପାର୍ଶ୍ୱ ପ୍ରତିକ୍ରିୟା ଦେଖାଯାଏ। କିଛି ଦିନ ପୂର୍ବରୁ ୫୦ ବୈଜ୍ଞାନିକ ଲାନସେଟ୍ ପତ୍ରିକାକୁ ଏକ ଖୋଲା ଚିଠି ଲେଖି ରୁଷର ଟିକା ସୁରକ୍ଷା ଉପରେ ସନ୍ଦେହ ସୃଷ୍ଟି କରିଥିଲେ। ଏହା ପରେ ପତ୍ରିକା ପକ୍ଷରୁ ଅଧ୍ୟୟନର ଲେଖକମାନଙ୍କୁ ବୈଜ୍ଞାନିକମାନଙ୍କ ପ୍ରଶ୍ନର ଉତ୍ତର ଦେବାକୁ କୁହାଗଲା |
ଭାରତର ଲୋକଙ୍କ ପାଇଁ ରୁଷର ଟିକା ବିଷୟରେ ମଧ୍ୟ ଆଲୋଚନା ଚାଲିଛି। କିଛି ଦିନ ପୂର୍ବରୁ ରୁଷର ରଷ୍ୟାନ ଡାଇରେକ୍ଟ ଇନଭେଷ୍ଟମେଂଟ ଫଣ୍ଡ(ଆରଡିଏଫ୍) ଭାରତୀୟ କମ୍ପାନୀ ଡକ୍ଟର ରେଡ୍ଡୀଙ୍କୁ ୧୦ କୋଟି ଟିକା ଦେବା ପାଇଁ ଏକ ଚୁକ୍ତିନାମା ସ୍ୱାକ୍ଷର କରିଥିଲା।
Comments are closed.