ଭାଷା ମୁଖର୍ଜୀ ବ୍ରିଟିଶର ନାଗରୀକ କିନ୍ତୁ ଭାରତର କୋଲକାତାରେ ତାଙ୍କର ପିଲାଦିନ ବିତିଛି । ଯେବେ ତାଙ୍କୁ ୯ ବର୍ଷ ହୋଇଥିଲା ସେତେବେଳେ ତାଙ୍କ ପରିବାର ବ୍ରିଟେନକୁ ଚାଲିଆସିଥିଲେ । ଏହି ୨୪ ବର୍ଷୀୟ ସୁନ୍ଦରୀ ୨୦୧୯ରେ ମିସ ଇଂଲଣ୍ଡର ମୁକୁଟ ହାସଲ କରିଥିଲେ । ମିସ ଇଂଲଣ୍ଡ ଟାଇଟେଲ ହାସଲ କରିବା ପୂର୍ବରୁ ସେ ବଷ୍ଟନର ପିଲିଗ୍ରିମ ହସପିଟାଲରେ ଶ୍ୱାସ ରୋଗ ବିଶେଷଜ୍ଞ ଭାବେ କାର୍ଯ୍ୟ କରୁଥିଲେ । କିନ୍ତୁ ଦୁନିଆରେ ଛାଇଥିବା କରୋନା ସଂକ୍ରମଣର ଭୟଭହତାକୁ ଦେଖି ଏହି ମୁକୁଟ ବିଜୟିନୀ ପୁଣି ନିଜର ଡାକ୍ତରୀ କାର୍ଯ୍ୟକୁ ଫେରିବାର ନିଷ୍ପତି ନେଇଛନ୍ତି ।
ସିଏନଏନକୁ ଦେଇଥିବା ଏକ ଇଂଟରଭ୍ୟୁରେ ଭାଷା କହିଛନ୍ତି ଯେ ଗତ ସପ୍ତାହରେ ସେ ବ୍ରିଟେନ ଫେରିଥିଲେ । ମିସ ଇଂଲଣ୍ଡ ମୁକୁଟ ପିନ୍ଧିବା ପରେ ସେ ଦୁନିଆର ଅଲଗା ଅଲଗା ସ୍ଥାନରେ ମାନବୀୟ କାର୍ଯ୍ୟରେ ସାମିଲ ହେଉଥିଲେ । ଦେଶରେ ବଢ଼ୁଥିବା କରୋନା ସଂକ୍ରମଣକୁ ଦେଖି ସେ ହସପିଟାଲ ଆସିବାର ନିଷ୍ପତି ନେଲେ କାରଣ ଦେଶଙ୍କୁ ଏବେ ତାଙ୍କର ଆବଶ୍ୟକତା ରହିଛି ବୋଲି ସେ ଇଂଟରଭ୍ୟୁରେ ଜଣାଇଛନ୍ତି ।
ସେହିଭଳି ଭାଷା ‘ଫକ୍ସ ନ୍ୟୁଜ’କୁ ଦେଇଥିବା ଏକ ଇଂଟରଭ୍ୟୁରେ ଜଣାଇଛନ୍ତି ଯେ, “ଏହା ମୋ ପାଇଁ ଏକ କଷ୍ଟ ନିଷ୍ପତି ନ ଥିଲା । ମୁଁ ଆଫ୍ରିକା, ତୁର୍କୀ ଯାଇଛି ଏବଂ ଭାରତ ସେହି ଏସୀୟ ଦେଶ ଗୁଡ଼ିକ ମଧ୍ୟରେ ପ୍ରଥମ ଥିଲା ଯେଉଁଠାକୁ ମୁଁ ଯାତ୍ରା କରିବାକୁ ଯାଇଥିଲି । । ଭାରତ ପରେ ମୋତେ ଆହୁରି ଅନ୍ୟ ଦେଶକୁ ଯାତ୍ରା କରିବାର ଥିଲା । କିନ୍ତୁ କରୋନା ଭାଇରସ କାରଣରୁ ମୋତେ ମୋ ଯାତ୍ରାକୁ ଅଧାରେ ଛାଡ଼ିବାକୁ ପଡ଼ିଲା । ମୋତେ ଜଣାଥିଲା ଯେ ମୋ ପାଇଁ ସବୁଠାରୁ ଭଲ ସ୍ଥାନ ହସପିଟାଲ ହିଁ ହେବ ।”
ସେ ଜଣାଇଛନ୍ତି ଯେ ସେ ନିଜ ମାନବୀୟ ଯାତ୍ରାରେ ଥିବା ସମୟରେ ତାଙ୍କୁ ସାଙ୍ଗମାନଙ୍କ ଠାରୁ ବାରମ୍ବାର ମେସେଜ ଆସୁଥିଲା । ଏହାପରେ ସେ ସେହି ହସପିଟାଲ ସହ ସମ୍ପର୍କ କଲେ ଯେଉଁଠାରେ ସେ ପୂର୍ବରୁ କାମ କରୁଥିଲେ ଏବଂ ପୁଣି ଜଣେ ଡାକ୍ତର ଭାବେ କାମ କରିବାର ଇଚ୍ଛା ପ୍ରକାଶ କରିଥିଲେ ।
ବର୍ତମାନ ଭାଷା ବିଦେଶରୁ ଆସିଥିବା କାରଣରୁ ୧୫ ଦିନ ପାଇଁ କ୍ୱାରେଂଟାଇନରେ ଅଛନ୍ତି । ଏହାପରେ ସେ କାମ ଆରମ୍ଭ କରିପାରିବେ ।
Comments are closed.